سكرتيره ولكن
الفصــل الثــآلــث
تاني يوم الصبح قومت بنشاط مبالغ فيه كنت نسيته من زمان بس انهارده غير اي يوم تاني .. انهارده اول تحقيق حلمي اللي كنت بتمناه من ساعه ما اتخرجت واخدت عهد علي نفسي اني لازم اوصل لهدفي واثبت ذاتي ويبقي ليا مكانتي في الشركة
قومت من نومي اتوضيت وصليت وصبحت علي بابا وماما ولبست هدومي ونزلت .. كنت ماشيه في الشارع ابتسامتي ماليه وشي .. احساس ان ربنا ادالك حاجة انتي بتحبيها حلو اوي فضلت ماشيه ادعي ربنا انه يوفقني ويبقي معايا دايما
وصلت الشغل في معادي وقبل معادي كمان ب 5 دقايق بس لاقيت الباب مقفول فضلت واقفه شويه ولاقيت سماح جايه صبحت عليا وفتحت الشركة دخلنا انا وهي انا فضلت واقفه مش عارفه اعمل حاجة لاقيتها بتقولي حطي شنطتك في الخزنه هنا دايما وتعالي معايا .. حطيت شنطتي وروحت معاها لاقيتها بتفتح مكتب استاذ سيف وبتقولي
بصي يا نادين انتي شغلك هيبقي مكاني انا معاكي بس اسبوع هعلمك الشغل وانتي هتستلمي مكاني
قولتلها باستغراب ليه انتي هتمشي
قالتلي اه عقبالك هتجوز وخطيبي للاسف رافض شغلي لان انتي عارفه المواعيد لحد الساعه 6 فهيبقي صعب عليا شويه
بصتلها بابتسامة وقولتلها الف مبروك ربنا يتمملك بخير
قالتلي الله يبارك فيكي
كنت انا وهي لسه واقفين في مكتب استاذ سيف قالتلي بصي كل يوم الصبح لازم اول ما تيجي تدخلي مكتب استاذ سيف لانه اخر واحد بيمشي وبيبقي مبهدل المكتب خالص ومش بيحب يجي يلاقي اي كركبه مع انه هو اللي بيعملها تظبطي بس المكتب وتخرجي تقعدي علي مكتبك
الموظفين كلهم بيجوا الساعه عشرة ونص السكرتاريه بس اللي بتيجي عشره علشان تفتحي وعلشان لو حاجة اخرتك في الطريق يبقي قدامك فرصه محدش يجي يلاقي الشركة مقفوله
قولتلها تمام
ظبطنا انا وهي المكتب وروحنا قعدنا علي مكتبنا والساعه عشرة ونص كل الموظفين بدأت تيجي يصبحوا علينا ويدخلوا علي مكاتبهم الا شخص واحد من الموظفين دخل وصبح عليا انا وسماح وقرب من المكتب وقال لسماح
مين الوجه الجديد
سماح بصتله بارف اوي وقالتله انسه نادين السكرتيره الجديده
قالها اه اللي هتاخد مكانك
قالتله ايوه هي
وطي وقرب وشه اوي مني وقالي تشرفنا انا خالد مسئول قسم التسويق
بعدت عنه وقولتله تشرفنا
بصلي بصه كلها خبث مفهمتهاش بس خوفتني منه وسابنا ومشي
لقيت سماح بتميل عليا وبتقولي خدي بالك منه مفيش واحدة بتسلم منه وياما طفش بنات من الشركة بسبب قله ادبه واللي تفكر بس تشوه صورته كان بيسبقها ويشوه صورتها وسمعتها حتي انا مخلصتش منه لولا بس اني كنت مخطوبه وعرفت اصده كويس وبادب واديني هرتاح منه ومن امثاله
قولتلها هو فيه كده
لاقيتها بتبص باستغراب وبتقول يااااااه في اكتر من كده كمان بس شكلك انتي اللي مش في الدنيا
قولتلها يمكن
بعد شويه لاقينا استاذ سيف جاي صبح علينا وبصلي وقالي
منورة يا نادين الشركة وكويس انك جيتي في معادك
ردت سماح بسرعه وقالتله وقبل معادها كمان يا استاذ سيف دي جايه قبلي انا شخصيا
رد وقال تمام بس يارب تفضلي كده علي طول ومفيش كسل
قولتله ان شاء الله مش هتكاسل ابدا
قالي ان شاء الله وهو في طريقه لمكتبه وقف وقالي صحيح يا نادين رجلك عامله ايه دلوقتي
قولتله الحمد لله كويسه جت سليمة فداك يا استاذ سيف
بصلي بنظره امتنان وسابني ومشي حسيت بالراحة الغريبه من الانسان ده بالرغم الهيبه والوقار اللي فيه الا انه جواه حنيه كبيره حسيتها من نظرة عنيه بس قررت اسيب حكمي عليه لحد ما اعرفه كويس
لاقيت سماح بتخرجني من شرودي وتقولي رجلك مالها
قولتلها ابدا بس امبارح استاذ سيف خبطني بالعربيه
لاقيت سماح بتقولي اااه علشان كده امبارح كنتي متبهدله خالص
قولتلها ايوه
قالتلي الف سلامة
قولتلها الله يسلمك
قالتلي اول ما استاذ سيف يجي لازم ادخله بفنجان القهوه والبريد اللي انتي المفروض تكوني طابعاه قبل ما هو يجي علشان يشوفه ويقولك تعملي ايه بالظبط في الردود
قولتلها تمام
قالتلي طب يلا نقوم نعمل القهوه وقالتلي بمرح بتعرفي ولا هتفضحينا
قولتلها بضحكة لاء بعرف بس هو احنا اللي بنعمل الحاجات دي
قالتلي ايوه احنا اللي بنعملها بس مش لاي حد لو حد طلب منك اي حاجة قوليله لاء لان هنا كل واحد بيخدم نفسه الا استاذ سيف بس وعلي فكرة ممكن تلاقيه قايم يعمل هو لنفسه القهوه عادي سيبيه هو بمزاج شويه
قولتلها تمام
فضلت واقفه جمبها اشوفها وهي بتعمل القهوه ودخلتهاله شويه وطلعت وفضلت سماح معايا تعلمني الشغل والحمد لله اني فهمت كل حاجة وساعدتها كتير في ترجمة الايميلات الخاصه لحد ما انتهي اول يوم في الشغل استأذنا من استاذ سيف ومشينا
انتهي اول يوم ليا في الشغل وانا حاسه اني اخيرا بقي ليا هدف وحاجة اعيش علشانها .. فضلت افتكر اليوم واعيد وازيد في التفكير فيه علشان اشوف ارتكبت اخطاء ولا لاء بس الحمد لله مرتكبتش اي خطأ في اليوم ده
روحت البيت ومينفعش يعدي يوم عليا من غير ما اقعد علي الكمبيوتر بتاعي .. فتحت النت وكلمت اسما وحكتلها علي كل حاجة دعتلي وقعدنا نتكلم شويه لحد ما حسيت اني تعبت وعايزة انام قومت نمت وانا بدعي ربنا انه يوفقني
كنت كل يوم بروح الشغل واتعلم كل يوم حاجة جديده من سماح بس كان تعاملي مع سيف قليل اوي .. كنت دايما بتكسف اتكلم معاه مكنش فيه بينا اي تعامل غير لما يطلب بس مني حاجة اعملها
ومع انتهاء الاسبوع استاذ سيف طلبني انا وسماح وفعلا دخلناله بعد ما سمحلنا بالدخول
دخلت انا وسماح ولاقيت سماح بتدي ورقه لسيف وبتقوله اتفضل يا استاذ سيف ده تقرير مفصل
قعد شويه يقرا الورقه اللي سماح ادتهاله وبصلي ووجهلي انا الكلام وقال
تمام يا سماح وانتي يا نادين سماح كاتبه فيكي شعر مش تقرير
مكنتش فاهمه حاجة بس اللي خمنته ان سماح كانت بتكتب ملاحظتها عني وان الاسبوع ده كنت تحت الملاحظة وان التقرير ده خاص بيا انا
خرجتني سماح من شرودي وهي بتقول لسيف
– هي انسانه كفء يا استاذ سيف وحضرتك هتشوف بنفسك
لاقيت سيف بيقول تمام يا سماح وانتي كده يا نادين اهلا بيكي في الشركة وسطينا
قولتله ده شرف ليا يا فندم اني اكون عند حسن ظن حضرتك واتمني اكون اد الثقه دي
قالي ان شاء الله تتقدرو تتفضلو
سلمت سماح علي استاذ سيف وودعته ونبهت عليه يحضر فرحها وافقها وباركلها وخرجنا انا وهي سلمت عليها وباركتلها ووعدتها اني هشوفها في فرحها ان شاء الله
انتهي اول اسبوع وبدأ اسبوع جديد .. اسبوع انا المسئوله فيه عن الشركة
ومكنش اول اسبوع عادي كان اول اسبوع هثبت فيه نفسي وجدارتي بجد في الشركة
الفصـــل الــرآبـــع
انهارده اول الاسبوع .. وانهارده بعتبره بدايه شغلي الحقيقي لاني بقيت مسئوله مسئوليه كامله عن الشغل من غير مساعده حد .. قومت من نومي وابتسامتي علي وشي وحاسه بالراحة الشديده والتفاؤل والامل في الحياه .. صليت ولبست هدومي ونزلت جري علي الشغل
وصلت الشركة ودخلت مكتب استاذ سيف زي كل يوم وبدأت اظبط الكركبه اللي هو عاملها .. مش عارفه ليه كنت مبسوطة وانا بروق مكتبه كنت حاسه اني مسئوله منه .. يمكن لاني بحب احساس المسئوليه وبحب احس ان حد مسئول مني .. او يمكن لانه انسان مهذب ويستاهل بجد اني اهتم بيه .. ولا يمكن لان ده شغلي وانا بحبه .. حاجات كتير كانت في دماغي بفكر فيها بس حاولت اهتم بشغلي وبس خلصت تظبيط المكتب وقفلته وروحت قعدت علي مكتبي وفتحت الكمبيوتر الخاص بيا وبدأت اشوف الايميلات الجديدة اللي وصلت للشركة وبدأت اطبعها واترجم المطلوب ترجمته منهم
بعد شويه بدأو الموظفين يجوا كل واحد دخل مكتبه .. شويه ولقيت خالد جاي عليا وبيقرب مني وبيقولي صباح الخير
حاولت ابعد عنه علي اد ما اقدر وقولتله صباح النور
قالي ايه هو انتي مش بتكلمي حد خالص كده ليه احنا هنا كلنا كده مع بعض
قولتله بحده ونظرة مليانه غضب معلش اصل انا جايه اشتغل مش جايه اتعرف علي حد وكلامي مع اي حد هنا هيبقي في اطار الشغل
بصلي بخبث كده وقالي بالراحة علي نفسك طيب ده انا هعمل معاكي جميل
مكنتش فاهمه كلامه ولا فاهمه هو يقصد ايه بس بصلي نفس النظرة الخبيثه اللي بصهالي اول ما شافني مش عارفه هو عايز مني ايه بس قررت ابعد عنه وتجنبه ولازم يتعامل بحده علشان يعرف ان مش كل البنات سهله
بعد شويه استاذ سيف جه بس كان شكله مش مظبوط خالص صبح عليا ودخل مكتبه سيبته يقعد شويه وروحت علشان اديله الايميلات والايميلات المترجمة
خبط ع الباب وبعد ما سمحلي بالدخول روحت قدامه وقولتله دي الايميلات اللي وصلت انهارده وترجمت جزء وبترجم في الباقي
بصلي اوي وبص للباب المفتوح وقالي بنبره جديه احنا هنا في شغل ممكن اكون عايز اقولك حاجة محدش يسمعها يعني الباب يتقفل وانتي داخله
بصتله وقولتله بنفس نبرته الحلال بين والحرام بين وربنا سبحانه وتعالي قال ما اجتمع رجل وامرأه الا ثالثهما الشيطان
قالي بضيق يا بنتي احنا في شغل مش هاكلك متخافيش
قولتله انا بتأسف لحضرتك جدا مش هقدر اعمل حاجة متربتش عليها لا طاعه لمخلوق في معصيه الخالق وانا ابويا رباني علي كده رباني ع الحلال والحرام
اخذ نفس جامد وخرجة بشده وبالرغم من العصبيه اللي كانت باينه عليه الا اني شوفت نظرة رضا باينه اوي في عنيه وقالي اتفضلي خلصي اللي في ايدك
طلعت من المكتب وقفلت الباب ورايا ودخلت عملتله عصير علشان يهديه مش عارفه ليه معملتلوش القهوه اللي متعود عليها بس حسيت اني زودتها معاه شويه قولت اهو حاجة تهدي اعصابه من ناحيتي شويه عملتله العصير وحطتله كيك معاه .. وروحت تاني خبطت وسمحلي بالدخول لما دخلت لاقيت وشه احمر جدا من العصبيه وكان ماسك الموبيل كنت حاسه انه هيرميه في وشي بس رماه ع المكتب
وقالي بعصبيه زايده جدا ايه اللي انتي جايباه ده
قولتله وانا بترعش ده عصير وكيك
قالي بصوت عالي وانا من امتي بشرب عصير انتي هتشربيني علي مزاجك اتفضلي اعمليلي القهوه
غصب عني نزلت مني دموعي ومكنتش قادرة امسكها وفضلت واقفه مكاني مش قادرة اتحرك اول مرة حد يهني كده كاني خدامه عنده انا مش مجبره ع الاهانه دي بس انا بحب شغلي بس كرامتي فوق اي اعتبار كنت ناويه اروح ارمي العصير وامشي من الشركة وانا بلتفت علشان امشي
لاقيته بيقولي انا اسف يا نادين انا بس اعصابي مشدودة اليومين دول هاتي العصير
فعلا مكنتش قادرة افهمه ولا استوعبه ازاي الجبروت ده يبقي في لحظة بالحنيه دي بس فعلا مكنتش قادرة اتحرك من مكاني
لاقيته بيقرب مني وبياخد من ايدي الصينيه وبيقولي تسلم ايدك يا نادين
من بين دموعي ابتسمت ابتسامة صغيره وسيبته ومشيت
مكنتش قادرة اعمل اي حاجة طول اليوم وكنت بخلص الايميل الواحد في ازيد من ساعتين مكنش عندي القدرة ع التركيز في اي حاجة غير الانسان الغريب اللي قاعد ورا الباب ده كان نفسي اوي اشوف هو بيعمل ايه وهو لوحدة كان عندي فضول اعرف ايه اللي عصبه مش عارفه ايه سر الاهتمام بس قطع شرودي صوت انسان بقيت بكره اسمع صوته
قرب مني خالد وقالي مالك زعلانه علشان زعقلك
بصتله بتحدي وسكت
بصلي نظرة فيها شماته غريبه وقالي اتعودي علي كده علشان هو كده وسابني ومشي
كنت متحيره في امر الشخص ده اوي ايه الغل والكره والخبث اللي فيه ده مكنتش شايفاه بني أدم ابدا مستحيل يكون ده بشر زينا اكيد شيطان علي هيئه بشر
بس قطع شرودي مرة تانيه صوت الاستاذ سيف من خلال الانتركم وهو بيطلبني عنده في المكتب
دخلت المكتب وقولتله تحت امرك يا استاذ سيف
قالي لو سمحتي يا نادين هاتيلي من عندك ملف شركة ” ……….. ” هتلاقي في دولاب الملفات هاتيه وتعالي
روحت فعلا جبت الملف وادتهوله اداني منه ورقه وقالي ترجمي الورقه دي وابعتيها ع الايميل اللي موجود عندك وهو بيكلمني كان بيقفل عينه جامد وماسك دماغه
قولتله مالك يا استاذ سيف فيك حاجة
بصلي وقالي لاء ابدا شويه ارهاق بس
قولتله اعمل لحضرتك قهوه
قالي ياريت يا نادين
روحت عملت القهوه واديته معاها اسبرينه ورجعت اكمل شغل عملت كل المطلوب مني وانا قاعده جه رد ع الايميل اللي بعته ترجمته وروحت لاستاذ سيف علشان يمليني الرد خبطت ع الباب وسمحلي بالدخول لما دخلت اتصدمت لاقيته ممدد ع الكنبه ومغمض عنيه
وقفت وحطيت وشي في الارض وقولتله ع اللي في الايميل لاقيته قعد ع الكنبه وملاني الرد وقالي لو سمحتي يا نادين مش عايز اي حد يدخل عليا دلوقتي
قولتله تحت امرك يا استاذ سيف
سيبته ومشيت وبدأت اشوف شغلي ونسيت اللي حصل منه الصبح بس فعلا مكنش طالعله اي صوت
انتهت مواعيد شغلي كنت خايفه اوي اخبط عليه وكنت قلقانه عليه اسيبه لوحدة .. طب استأذن منه .. طب اشوفه عايز حاجة .. مكنتش عارفه اعمل ايه فضلت قاعده حوالي نص ساعه بعد مواعيد شغلي من الحيره اللي كنت فيها ومش عارفه اعمل ايه
روحت خبطت عليه وفتحلي وقالي باستغراب ايه اللي مقعدك لحد دلوقتي
قولتله يمكن حضرتك تعوز مني حاجة
قال بابتسامة لاء اتفضلي انتي
وانا ماشيه وقفت علي صوته وهو بيقولي نادين
التفت ليه وقولتله نعم
قالي متشكر
معرفش هو بيشكرني علي ايه بس لاقيت نفسي ببتسم ليه وسيبته ومشيت
حسيت ان قلبي في حاجة مش طبيعيه بس قدرت اوقفه عن اي تفكير سلبي انا مش عايزة احب ولا عايزة اتعلق بحد علشان انا قلبي مش ملكي انا قلبي ملك نصيبي وبس وهو وحده اللي يستاهل القلب ده فضلت وانا ماشيه اذكر ربنا علشان الهي نفسي عن التفكير في سيف
روحت البيت واول مرة احس اني تعبانه كده كنت مرهقه بجد مش مرهقه من الشغل مرهقه من التفكير
بس مش عارفه ليه كان عندي شعور قوي واحساس اني عايزه احكي لاسما حسيت اني عايزه منها دافعه تثبت قلبي علي قراره اللي اخده من زمان كنت خايفه اضعف واعيش الوهم وعلشان كده فتحت كمبيوتر وكلمت اسما
بعد ما سلمت عليها وعرفنا اخبار بعض قالتلي عامله ايه في الشغل
قولتلها الحمد لله ولاقيت نفسي بشكل تلقائي بحكيلها علي كل حاجة
بعد ما خلصت كلامي حسيت اني ارتحت من العبئ اللي عليا
لقيتها بتقولي انتي في شغل وهتقابلي ناس كتير اوي ولازم تستحملي علشان تثبتي نفسك وذاتك وبعدين هو اتأسفلك وعرف غلطه معني كده انه انسان كويس بس انا مش عايزاكي تجري ورا مشاعرك حكمي عقلك علشان متنجرحيش محدش يستاهل قلبك غير اللي يطلبك في الحلال متهتميش بالامور دي ومتحطيهاش في دماغك
من كلامها حسيت انها صحت ضميري تاني اللي الشيطان كان بيحاول يلعب بيه
قعدنا نتكلم وتنصحني كتير اني احافظ علي قلبي علشان اقدمة لجوزي حته الماس نضيفه مفيهاش اي خدش وبعد كلام كتير اتكلمناه قفلت معاها ودخلت نمت وانا علي يقين ان محدش بياخد اكتر من نصيبه وان نصيبي هيجي هيجي
