قلها هديكي
بعد الفرح خالد خد اسراء وراحوا على فيلته الكبيرة، الفيلا كانت ضخمة اوي وفيها اوض كتير وجنينة كبيرة. قالها بصي يا اسراء، انتي هتعيشي في الاوضة اللي في الدور التاني، وانا هعيش في اوضتي اللي في الدور الاول، وهننزل نفطر مع بعض الصبح عشان الخدم يشوفونا، ولو عندنا عزومة او مناسبة هنمثل اننا مبسوطين، مفهوم. اسراء هزت راسها ودخلت اوضتها وقفلت الباب عليها وقعدت تعيط جامد اوي، حست انها باعت حريتها وانها بقت محبوسة في قفص دهب.
الايام الاولى كانت صعبة اوي على الاتنين، خالد كان بيصحى بدري يروح شغله ويرجع متأخر، واسراء كانت قاعدة لوحدها في الفيلا مش عارفة تعمل ايه، كانت بتساعد الخدم في المطبخ رغم انهم كانوا بيرفضوا، وكانت بتقعد في الجنينة تقرا كتب او تكلم سمر في التليفون. خالد كان بيتعامل معاها ببرود شديد وكأنها مش موجودة، وده كان بيريحها شوية عشان كان بينفذ وعده انه ميلمسهاش. بس مع الوقت ابتدى ياخد باله من حاجات صغيرة فيها، لاحظ انها حنينة اوي مع الخدم ومع الجنايني الراجل العجوز، وانها بتصحى تصلي الفجر وتقعد تدعي كتير، وانها لما بتضحك ضحكتها بتملى البيت كله نور.
في مرة كان خالد راجع من الشغل تعبان جدا وكان عنده صداع شديد، دخل الفيلا ملقاش حد صاحي غير اسراء، كانت قاعدة في المطبخ بتعمل شاي، اول ما شافته قالتله شكلك تعبان اوي يا استاذ خالد، تحب اعملك حاجة. هو قالها بضيق سبيني في حالي انا مش عايز حاجة من حد. بس هي مسمعتش كلامه وعملتله كوباية ينسون سخنة وحطت فيها عسل وجابتله برشام للصداع وحطتهم قدامه وسابت ومشيت بهدوء. خالد شرب الينسون وحس انه ارتاح شوية، واول مرة يحس ان في حد مهتم بيه بجد من غير مصلحة، من ساعة ما امه ماتت وهو صغير.
موقف تاني حصل لما زين راح الشركة وحاول يوقع بين خالد واسراء، راح لاسراء وقالها خالد ده بيلعب بيكي، هو متجوزك عشان مصلحته وبعد ما ياخد الشركة هيطردك من غير ولا مليم، وهيتجوز بنت من مستواه. اسراء سمعت الكلام وسكتت بس من جواها اتوجعت اوي، وحست بغيرة غريبة اول مرة تحسها، هي مكنتش فاهمة هي متضايقة ليه، هو مش جوازهم مزيف، المفروض متفرقش معاها هيتجوز مين بعده. لما خالد رجع البيت لقى اسراء ساكتة ومش بتتكلم، سألها مالك، قالتله مفيش، بس هو حس ان في حاجة، ولما ضغط عليها حكتله اللي زين قاله. خالد اتعصب جدا وراح مسك دراعها جامد عشان يطمنها وقالها اوعي تصدقي كلام زين ده كداب، انا عمري ما هأذيكي، انتي مراتي بجد حتى لو العقد بيقول غير كده.
