قلها هديكي
وهنا خالد افتكر انه كسر الشرط الاول، هو لمسها، مسك دراعها، واسراء كمان افتكرت، بصت لايده اللي ماسكة دراعها وعينيها دمعت، قالتله انت كسرت وعدك يا خالد، انت قولت مش هتلمسني. خالد ساب دراعها بسرعة واتلخبط وقالها انا اسف مكنش قصدي، انا بس كنت عايز اطمنك، بس من جواه كان حاسس بحاجة غريبة، لمسة ايديها كانت دافية اوي وحس بقلبه بيدق بسرعة اول مرة في حياته. من بعد الموقف ده كل حاجة اتغيرت بينهم.
خالد مبقاش قادر يبعد عنها، بقى يتعمد يقعد في البيت اكتر، يفطر معاها كل يوم ويحكي معاها عن شغله وعن ذكرياته مع ابوه محمود، واسراء كمان بقت تحكي له عن احلامها وعن ابوها وتعبها في الحياة. ابتدوا يقربوا من بعض واحدة واحدة، وايه صاحبتها لاحظت ان اسراء بقت تلبس احلى وتهتم بنفسها اكتر، وسمر اختها بقت تقولها انتي باين عليكي بتحبيه يا اسراء. اسراء كانت بتنكر بس هي من جواها كانت عارفة انها وقعت في حب خالد، حبت رجولته وحنيته اللي كان مخبيها ورا البرود، وحبت انه سند بجد.
مرة بليل النور قطع في الفيلا واسراء بتخاف جدا من الضلمة، فضلت تصرخ في اوضتها وخالد سمعها وطلع جري وفتح الباب لقىها قاعدة على السرير وبتترعش، من غير ما يفكر قعد جنبها ومسك ايديها وفضل يطمنها لحد ما النور رجع، والمرة دي هي ماقلتلوش انه كسر الشرط، بالعكس كانت ماسكة في ايده جامد ومش عايزاه يسيبها. خالد حس انه خلاص مش قادر يمثل اكتر من كده وانه عايز الجواز المزيف ده يبقى حقيقي.
وفي يوم خالد كان عنده حفلة كبيرة اوي في الشركة بمناسبة مشروع جديد، وكان لازم اسراء تحضر معاه كزوجته، لبست فستان بسيط وشيك اوي كان خالد جايبهولها هدية، ودخلوا الحفلة ماسكين ايد بعض، كل الناس كانت بتبص عليهم وبتقول قد ايه لايقين على بعض. زين كان موجود في الحفلة وحاول يبوظ اليوم وراح قال قدام كل الناس بصوت عالي، على فكرة يا جماعة الجوازة دي كلها تمثيلية، ده عقد زواج مزيف عشان خالد ياخد الشركة، اسراء واخدة مليون جنيه عشان تمثل انها مراته. الناس كلها سكتت وبصت عليهم بصدمة، واسراء وشها بقى احمر من الكسوف وحست ان الارض هتتشق وتبلعها، ودموعها نزلت غصب عنها وجريت بره القاعة.
