عملت اكونت فيك
ضحى كانت واقفة في اخر المدرج بتضحك مع روان ونادين والدنيا حواليها دوشة والمحاضرة لسه ما بدأتش والدكتور فهد داخل بخطوات تقيلة ونضارته في ايده وكل البنات سكتت مرة واحدة كأنه دخل لجنة امتحان مش محاضرة عادية هو كان اصغر دكتور في القسم كله وسمعته سابقة اسمه دكتور شديد وما بيهزرش وما بيديش درجات بالساهل وشكله دايما مكشر حتى وهو بيشرح تحسيه بيتخانق مع السبورة ضحى كانت بتكره طريقته بس في نفس الوقت كانت معجبة بذكاءه وكانت دايما تقول لصحابها انا لو اتجوزت دكتور مش هتجوز غير واحد زي فهد عشان يربي العيال صح روان تضحك وتقولها يا بنتي ده يربي الدفعة كلها مش العيال بس ونادين اللي كانت اعقل واحدة فيهم كانت تقولها بطلي هبل وركزي في المذاكرة بدل ما تشيلي المادة دي كمان
في يوم من الايام وهما قاعدين في الكافيتيريا بعد محاضرة طويلة ومملة ضحى كانت زهقانة وبتقلب في تليفونها وجاتلها فكرة مجنونة قالت لروان ونادين بقولكم ايه ما تيجوا نعمل مقلب في دكتور فهد نادين اتخضت وقالت لها انتي اتجننتي مقلب ايه في دكتور فهد ده ممكن يسقطنا كلنا ضحى ضحكت وقالت لا يا بنتي مقلب خفيف كده هعمل اكونت فيك على الفيسبوك وهبعتله رسائل حب كأني طالبة معجبة بيه من بعيد ونشوف رد فعله هيبقى عامل ازاي اكيد هيتكسف وهيتوتر وهنضحك شوية روان اللي بتحب الهيصة وافقت على طول وقالت ايوه يلا ده هيبقى جامد اوي نادين فضلت تقول بلاش يا ضحى بلاش الحركات دي هتودينا في داهية بس ضحى كانت خلاص قررت وعملت الاكونت في نفس اللحظة سمت نفسها ياسمين وكتبت في البايو طالبة في سنة تالتة وبحب الهدوء والقراءة وحطت صورة بنت من على النت مش باين وشها اوي
اول رسالة بعتتها كانت بليل متأخر كتبت له مساء الخير يا دكتور انا عارفة ان اللي بعمله ده جنان بس انا مش قادرة اسكت اكتر من كده انا معجبة بحضرتك من اول محاضرة حضرتها ليك وبحب طريقة شرحك وبحب احترامك لنفسك ولينا حتى وانت شديد علينا انا عارفة انك مش هترد بس كنت محتاجة اقول الكلام ده وبعتت الرسالة وقلبها بيدق بسرعة وقفلت التليفون وهي بتضحك مع روان اللي كانت قاعدة جنبها مستنية الرد
المفاجأة انه ما ردش في نفس اليوم ولا تاني يوم وضحى قالت خلاص شكله ما بيفتحش الرسائل او شافها وطنش وده المتوقع من دكتور فهد بس بعد تلات ايام وهي قاعدة في المحاضرة بتاعته بتكتب وراه لقت تليفونها بيعمل فايبريشن فتحت بسرعة لقت اشعار ان ياسمين جالها رسالة فتحت الرسالة لقت رده كان كاتب شكرا على كلامك الجميل ده وانا مقدر مشاعرك جدا بس يا ريت اعرف انتي مين ضحى اتصدمت ووشها احمر وروان بصت لها وقالت لها ايه في ايه ضحى وطت صوتها وقالت لها ده رد ده رد يا روان