تولين
تولين كانت بنت من النوع اللي اول ما تدخل اي مكان كل الناس تبصلها غصب عنها، مش عشان هي مغرورة ولا حاجة، هي اصلا طيبة جدا وجدعة، بس هي متربية في بيت عيلة كبير في الزمالك، بيت كل حاجة فيه بالشوكة والس/كينة، ماما وبابا وتيتا وجدو، كلهم شايفين ان سمعة العيلة اهم من اي حاجة في الدنيا، واي تصرف بيتحسب بالملي، ولو واحدة من بنات العيلة لبست لبس مش عاجبهم بتبقى مصيبة، ولو خرجت مع حد مش من مستواهم بتبقى كارثة، تولين كانت طول عمرها البنت المثالية اللي بتسمع الكلام، بتذاكر كويس، بتلبس كويس، بتتكلم كويس، عمرها ما عملت مشكلة.
تولين كانت شغالة في شركة كبيرة بتاعة ديكور واستيراد، هي خريجة فنون جميلة وبتحب شغلها قوي، وكانت اشطر واحدة في التيم بتاعها، والكل بيحبها، مديرتها بتحبها والعملا بيحبوها، وهي بصراحة كانت شاطرة بجد مش بالكلام، كانت بتسهر بالايام عشان تخلص تصميم، وكانت عندها ذوق رهيب، اي عميل يدخل يطلبها هي بالاسم.
في الشركة كان فيه عم سراج، الراجل الطيب بتاع البوفيه اللي كل الناس بتحبه، راجل كبير في السن ووشه بشوش ودايما بيضحك، وبيعمل احلى شاي بالنعناع في الشركة كلها، وبيحفظ كل واحد بيحب شايه ازاي، وبيحفظ اسماء الكل، عم سراج كان عنده ابن واحد بس، اسمه امير، ومكنش بيجي الشركة كتير.
امير مكنش زي ما الناس متخيلة، هو اه ابن عم سراج الساعي، بس كان شاب زي القمر، طويل وعريض ووشه سمح، متعلم ومتربي وعنده كاريزما غريبة، وعينيه فيها حزن وهدوء يخلي اي حد يرتاح له، كان بيجي ساعات يساعد ابوه بعد مواعيد الشغل لما يكون ابوه تعبان، او يجي يوصله لما الدنيا تضلم.
تولين اول مرة شافته كانت بتسهر في الشركة عشان عندها تسليم مشروع مهم، وكان الوقت متأخر وكل الناس مشيت، والدنيا ساكتة والمطر بينزل بره، وفجأة لقت شاب داخل لابس تيشرت بسيط وجاكت جينز وشايل كيس فيه علب دوا لابوه، قالها مساء الخير انا امير ابن عم سراج، جيت بس اطمن عليه عشان كان تعبان الصبح وسمعت انه لسه هنا.
تولين استغربت من هدوءه وطريقة كلامه، مش طريقة شاب عادي، طريقة حد واثق من نفسه قوي ومتربي قوي، ومش بيبص لها بصة وحشة زي شباب كتير، قعدت تتكلم معاه خمس دقايق لقيت نفسها بتضحك من قلبها بعد يوم طويل ومرهق، وحست انها تعرف الشاب ده من زمان، من ساعتها بقت تستنى اللحظات اللي بيجي فيها، بقت تروح البوفيه كتير وتطلب شاي حتى وهي مش عايزة شاي.
