حكايات نور
“إنتي بتضحكي على إيه يا مجنونة؟ بقولك الفلوس بقت في حسابي، الـ ٩٠٠ ألف اتسحبوا خلاص والتوكيل حاطه في عينك! إنتي اتجننتي ولا الصدمة طيرت برج من عقلك؟”
رديت عليه بصوت واطي ومسكون ببرود أبرد من الثلج:
“اضحك يا عصام.. اضحك على قد ما تقدر، لأن دي آخر مرة هتضحك فيها في حياتك. بص كده كويس في الإشعار الورقي اللي في إيدك.. بص على اسم الحساب اللي اتسحب منه الفلوس وعلى كود الفرع.. الفلوس اللي إنت سحبتها دي مش فلوس تعويض أبويا.. الفلوس دي عهدة شركة “الراوي للمقاولات”، وفلوس الشيكات اللي الموردين مستنيين يصرفوها الساعة ١٢ الظهر! إنت يا شاطر سحبت عهدة شركة بتمتلكها أكبر حيتان البلد، ومضيت على استلامها ببطاقتك الشخصية وتوكيل ملغى صلاحيته مالياً من السنة اللي فاتت!”
السكوت حلّ في الخط. سكوت مرعب، حسيت فيه بصوت أنفاسه وهي بتتسارع وتتحول لفحيح.
“إنتي.. إنتي بتقولي إيه؟ دي الرسالة كانت على تليفونك أنتِ! ٩٠٠ ألف جنيه يا نصابة!”
“الرسالة كانت تنبيه لإلغاء تفويض عهدة قديمة يا نصاب.. إنت اللي أعمى الطمع عينك، وما كلفتش نفسك تقرأ الحروف الصغيرة. إنت دخلت البنك بالسرقة والتزوير، وسحبت فلوس ناس مش بترحمه، وفي خلال نص ساعة من دلوقتي، لما الشيكات تترفض في الفرع الرئيسي، السيستم هيبلّغ تلقائياً عن اختلاس المبلغ.. اشرب بقى يا عصام، وريني الأرض بتاعتك هتطلعك من التخشيبة إزاي!”
قفلت السكة في وشه، ومن غير ما أتردد ثانية واحدة، مسكت شنطتي ولميت هدوم بناتي بسرعة وهدوء شديدين. كنت مجهزة نفسي لكل السيناريوهات، لكن قدر ربنا كان أسرع وأنفذ من أي خطة رسمتها. نزلت من البيت وأنا باخد نفس عميق، نفس ما تنفستوش من سنين.. نفس الحرية من ظلم إنسان عاش يقص في جنحاتي ويقتات على تعبي.
طلعت على مجمع المحاكم، وقابلت الأستاذ فريد، المحامي اللي مسك قضية التعويض من بدايتها. لما حكيتله اللي حصل، ووريته أوراق شهادات الاستثمار المقفولة باسم البنات، وإشعار عملية السحب اللي عصام أورث نفسه فيها المصيبة، الأستاذ فريد قام وقف من على الكرسي وضرب كف بكف وهو بيضحك بذهول:
“ده مش بس غبي يا مدام ياسمين.. ده كتب شهادة وفاته بيده! سحب عهدة شركة مقاولات بالتوكيل البنكي المزود بإلغاء إداري؟ دي فيها تزوير، واستيلاء على مال غير حق، وخيانة أمانة مغلظة! غير إن صاحب الشركة ده أنا أعرفه شخصياً، ده رجل أعمال مش بيسيب حقه لو على رقبة مين!”
