جوزي الطيار
قال بصوت مليان صدمة.
— مستحيل…
إنت!
ابتسم الدكتور.
— بقالنا سنتين ما اتقابلناش يا كابتن كريم.
كريم قرب منه بخطوات بطيئة.
وقال:
— أنا دفنتك بإيدي.
الدكتور رد وهو بيبتسم ابتسامة غامضة.
— أوقات…
لازم العالم يصدق إنك ميت…
علشان تقدر تكمل شغلك.
وقبل ما كريم ينطق…
سمعنا صوت صفارات سيارات الشرطة تحاصر المصنع من كل اتجاه.
الدكتور بص من الشباك…
ثم ابتسم لأول مرة بثقة كاملة.
وقال:
— للأسف…
الشرطة مش جاية تنقذكم…
الشرطة جاية تاخدكم.
الفصل الثاني عشر
فضلت أبص للدكتور سامح.
وبعدين بصيت من الشباك.
العربيات فعلًا كانت بتملأ المكان.
صفارات الشرطة قربت.
وأصوات الأبواب وهي بتتفتح كانت واضحة.
تنفست الصعداء.
قلت بسرعة:
— الحمد لله.
لكن الدكتور سامح ضحك.
ضحكة هادية.
كأن اللي بيحصل قدامه متوقعه من زمان.
قال:
— واضح إنك لسه فاكرة إن الدنيا أبيض وأسود.
بصيتله بعدم فهم.
— يعني إيه؟
رد وهو بيقفل الملف قدامه.
— يعني مش كل حد لابس بدلة شرطة… يبقى جاي يحميكي.
وقبل ما أستوعب كلامه…
سمعنا صوت خبط عنيف على باب المصنع.
صوت راجل صرخ:
— افتحوا… شرطة!
كريم قرب من الشباك.
بص دقيقة.
وشه اتغير.
رجع بسرعة وقفل الستارة.
همس:
— دول مش القوة اللي كنت مستنيها.
قلت بتوتر:
— عرفت منين؟
رد:
— العربيات من بره شرطة.
لكن اللي لابسهم…
مش كلهم ضباط.
الدكتور سامح ابتسم.
— أخيرًا بدأت تفهم.
بعد ثواني…
الباب الخارجي اتكسر.
وصوت خطوات كتير بدأ يقرب.
الدكتور سامح فتح درج المكتب.
طلع منه حقيبة جلد صغيرة.
رماها ناحية كريم.
— خدها.
كريم مسكها باستغراب.
— دي إيه؟
— الحاجة اللي بيدوروا عليها من سنتين.
قلت بسرعة:
— والفلاشة؟
بصلي الدكتور.
— الفلاشة فيها جزء من الحقيقة.
لكن الحقيبة…
فيها الحقيقة كلها.
قلبي اتقبض.
كل شوية يظهر دليل جديد.
وكل دليل يفتح عشر أسئلة.
وفجأة…
اتفتح باب المكتب بعنف.
دخل تلات رجالة.
لابسين سترات الشرطة.
لكن أول ما دخلوا…
واحد منهم خلع الكاب.
عرفته فورًا.
كان الراجل اللي قابل كريم تحت العمارة.
ابتسم وقال:
— خلص وقت الهروب.
رفع س\لاحه.
